डॉक्टरांनाही हवी सुरक्षा!

करोनाचा वाढता फैलाव रोखण्यासाठी पालिका रुग्णालयांमध्ये करोना तपासणी केंद्रांसह तापासाठीची ओपीडीही सुरू करण्यात आली. या ठिकाणी नियुक्त करण्यात आलेले अनेक निवासी डॉक्टरही अहोरात्र काम करत आहेत. मात्र, या डॉक्टरांना करोनाप्रतिबंधक पोशाख आणि मास्क अद्याप देण्यात आले नसून, ते केवळ करोना केंद्रांतील रुग्णांची तपासणी करणाऱ्या डॉक्टरांना देण्यात आले आहेत. त्यामुळे निवासी डॉक्टरांच्या जिवाला धोका असल्याची भीती निवासी डॉक्टरांच्या 'मार्ड' या संघटनेने व्यक्त केली आहे.

या संदर्भात 'मार्ड'ने मुख्यमंत्री उद्धव ठाकरे यांना पत्रही लिहिले आहे. निवासी डॉक्टरांना करोनाप्रतिबंधक किट आणि मास्क उपलब्ध नसल्याबद्दल चिंता व्यक्त केली आहे. वैद्यकीय उपचार करणारे डॉक्टर आणि निवासी डॉक्टरांसोबत काम करणारे वैद्यकीय कर्मचारी तसेच सफाई कर्मचारी यांच्याही जीवाला यामुळे धोका निर्माण होऊ शकतो, असे 'मार्ड'चे म्हणणे असून, रुग्णालयात पोषक आहाराची समस्याही असल्याचे निवासी डॉक्टरांनी निदर्शनास आणून दिले आहे.

एकच मास्क तीन-चार दिवस वापरला जातो. शिवाय जे डॉक्टर कस्तुरबा तसेच विमानतळावरही काम करतात त्यांचीही व्यवस्थित वैद्यकीय तपासणी होऊन त्यांना संसर्ग नसल्याची खातरजमा केली जावी, अशी मागणीही 'मार्ड'ने केली आहे.